Рецензия на «Кроссворд» (Шафкат Ганиев)

. КРОССВОРД

35 яшемә кадәр беркайчан да кроссвордлар белән мавыгып, баш ватмадым. Цехтагы хемәттәшләремнең, бар эшләрен калдырып, бәхәсләшә-бәхәсләшә, гәҗит, журналлары тузып беткәнче, кроссворд чишкәннәрен күрсәм: "Нинди юләрлек бу!" — дип гәҗәпләнә идем.
Бервакыт поездда кайтканда, үзем белән алган гәҗитләрне укып бетергәч, вакыт узмауга аптырагач, кроссворд чишәргә тотындым. Белгән берничә сүзләрне яздым да, алдагысын белмәгәч, күземне тәрәзәгә төбәп, уйга баттым. Җиңел генә сүзләр кебек, ә искә төшереп һич булмый! Янымда барган ханым, минем уйларны аңлады булса кирәк: "Нинди сорау, әйтегез әле?' — диде. — "Эт токымы, дүрт хәреф, беренчесе М хәрефе". Икәүләп уйлаштык, кирәкле сүз табылмый гына бит. Ул, торып басты да, башка пассажирларга мөрәҗәгать итте. Кемдер: "МОПС!" — дип кычкырды. Мопсны тиз генә язып та куйдык. Минем кебек авыл малаена бар этләр дә 2 хәрефле һәм кушаматлы эт инде ул. Әллә нинди токымнар барлыгын каян белмәк кирәк!
Алдагы сорауның да җавабын белмибез. Юлдашым тагын халыкка мөрәҗәгать итте. Кыска вакыт эчендә җавап та табылды. Шул рәвешле, кроссвордны күмәкләшеп, чишеп, Ижауга кайтып җиткәнне сизми дә калдык.
Дүшәмбе көнне кемдер эшкә шул ук гәҗитне алып килгән. Әй, җыелышып, төрле вариантлар куеп, чиләнәләр бит! Берсе, өенә шалтыратып, хатынына энциклопедиядән карарга кушты. "Чиләнмә, җавабы Сириус", — дидем. Очраклы гына әйтте дип уйладылар, бугай. Калганнарын эзләп, тагын уйга чумдылар. "Ничә хәреф?" — дип сораган булам да, җавапларын әйтә барам. Барысын да язып бетергәч: 'Нигә элегрәк булышмый идең, беләсең икән бит?!" — дип аптыраштылар. Кичә поездда шул кроссвордны бөтен вагон белән чишкәнне сөйләп, көлдердем үзләрен.
Менә бит, ата ялкаулар, эшсезләр өчен дип уйлаганым бик тә кызыклы, мавыктыргыч шөгыль булып чыкты! Башны эшкә җигеп, уйлангач кына күп нәрсәне белә башлыйсың икән. Шул вакыйгадан башлап, мин дә кроссвордлар, сканвордлар, чайнвордлар белән кызыксына башладым.

Шәфкать Ганиев,
Ижау шәһәре.

Шафкат Ганиев   15.09.2024 17:10   •   Заявить о нарушении